C پروقرامچی‌لارین سئودیکلری بیر فانکشن اولسا، او حتما printf فانکشنی‌دیر.
printf فانکشنی، سونّتی و تانیش اولان "hello world" پروقرامین اونوتولماز بؤلومو اولدوغونا گؤره، هر بیر یئنی ایشه باشلایان پروقرامچی‌نین ایلک ایستیفاده ائتدیگی و باجاردیغی فانکشن تانینیر. آنجاق printf فانکشنی، یالنیز بوراخیش صفحه‌ده متن گؤسترمک اوچون دئییل و داها چوخ ایشلر گؤرور و بو قیسمتده بیز printf فانکشنه گؤره صؤحبت ائده‌جه‌ییک.
چوخلارینیزین بیلدیگی تکین، printf فانکشنی C پروقراملاما دیلی‌نین بوراخیش صفحه‌یه متن ارسال ائدن چوخ ساییدا ایشله‌نن فانکشن‌لردن‌دیر. آنجاق puts فانکشنینه گؤره قات قات گوٚجلودور!
دوٚز puts تکین، printf فانکشنی ده stdio.h ایله تعریف اولونور.
آشاغیداکی کوْدا باخسانیز، printf فانکشنی، ایکی یول ایستیفاده اولونوب‌دور، یعنی 4-جو و 5-جی سطرلرده.
#include <stdio.h>
int main ()
{
printf ("This is how to use printf");
printf ("But not the all");
return (0);
}
بئله‌جه‌سینه یازدیغیمیز printf فانکشنی، چوخراق puts فانکشنی تکین چالیشیر.
یعنی printf فانکشنین بورادا نه ائتدیگی، ساده‌جه بیر ایسترینگی ایکی پارانتز آراسیندا ساخلاماق‌دیر، آیری بیر ایش گؤرمور و string ایسه ایکی دوبل-کوت آراسیندا تعریف اولوبدور.
ایندی پروقرامی کامپایل و ایجرا ائدین. قاباقکی تمرین‌لره گؤره ترمینال‌دا گؤردویونوز فرقلی اولاجاق و یازدیغینیز سطرلرین هر بیرینی آیری سطرلرده گؤرمویه‌جکسینیز!
Output Terminal
This is how to use printfBut not the all
Process returned 0 (0x0) execution time : 0.005 s
Press ENTER to continue.
عیلّت ده آیدین‌دیر. سطرین قورتاریش و آیری سطره گئچمک دستوری وئرمه‌دیگینیزه گؤره، سطرلرین ایکیسی ده بوراخیشدا یاپیشیقلی گؤرونه‌جکلر.
ایندیکی سطرین دگیشیمه‌سی و بیر سطر آشاغیدا داوام ائتمک اوچون، بک-ایسلش \ و سونرا n یازین، یعنی \n
آشاغیداکی پروقرام‌دا ائله بونو یئرینه یئتیرمیشیک.
یئنی سطر باشلاماق اوچون ده یازیلان \n قاچیش کاراکتری، بولد شکیلده گؤره بیلرسینیز.
#include <stdio.h>
int main ()
{
printf ("This is how to use printf\n");
printf ("But not the all\n");
return (0);
}
بوراخیش دا آشاغیداکی اولاجاق.
Output Terminal
This is how to use printf
But not the all
Process returned 0 (0x0) execution time : 0.005 s
Press ENTER to continue.