نورمال اینسانین دیلی ایکی بؤلومدن جورلنیب: صرف (semantics-speech) و نحو (syntax).
ائله اونون تکین C پروقراملاما دیلی‌نین ده اؤزونه مخصوص صرف و نحوی وار.
C دیلیندن باشی چیخمایان بیری، C دیلینده یازیلان سورس-کودا باخسا، اونون باش-قولاغیندان ائله بیر زاد باشا دوٚشمز. آنجاق C دیلی‌نین قواعیدیسینی اؤیرنینجه، سورس کوْدون نه موضوعو آنلاتدیغینی باشا دوٚشمگه باشلایاجاق.
بو کیتاب‌دا بیز C دیلی‌نین صرف و نحوین آچیقلایاجاییق و نئجه ایستراکچرلنمگی و اصلی (main) فانکشنین دوغرودان نه یاپدیغینی دا آچیقلایاراق، فانکشن‌لر، موتغیرلر، آچار-سؤزلر، میقدارلار و ایستراکچرلر ایله ده سیزی تانیش ائده‌جه‌ییک.
Code::Blocks IDE موحیطینده منو سئچیم‌لریندن File و سونرا New و سونرا Empty File قیسمتی سئچین.
یعنی بئله: File → New → Empty File
ایندی سیز یازماق موحیطینده‌سینیز. داریخماغا گر‌ک یوخ، ساده‌جه بیر سطر یازاجاقسینیز. یازین main و دالیسیجا دا ایکی پارانتز و سونرا آکولاد آچیق و آکولاد باغلی.
بئله بیر زادی یازمالیسینیز:
main () {}
ایندی بو یازی‌یی ذخیره ائدین. اوٚستده‌کی اصلی منودان File و سونرا Save file یا دیرک (موستقیم) Save ائتمک اوچون، اونون مخصوص دوگمه‌سینی وورون، فلاپی درایو شکلینده بیر آیکون اولاجاق.
بو فایل اوچون آدی dummy.c یازین و ذخیره ائدین.
ایندی build ائتمک ایله سورس کوْدو کامپایل و لینک ائدین.
سیزین گؤردویونوز بو کوْد، C دیلینده "dummy" تانینان لاپ قیسا و بالاجا پروقرام‌دیر.
بوتون C کوْدلاریندا بو main فانکشنی اولمالی‌دیر و بو دقیقا پروقرامین ایجرا اولان یئری‌دیر و main فانکشنین موحتویاتی ایکی آکولاد آراسیندا ایحاطه اولونور.
بیز یازان dummy پروقرام‌دا بوٚتون زادلار بوش بوراخیلیب‌دیر و لاپ بئله کامپایلر، ایخطار پیغامی وئرسه ده سیخینتی دئییل و عیبی یوخدور.
پروقرامین بیر ایش گؤرمه‌دیگینه گؤره، بوراخیشی (خروجی) دا اولمایاجاق و بو دا گؤزلنیردی.
Output Terminal
Process returned 0 (0x0) execution time : 0.004 s
Press ENTER to continue. اوست‌ده‌کی بوراخیش صفحه‌سینده اؤنجه بوش سطر وار و آشاغی‌سیندا بیراز آیری یازیلار.
یعنی "Process returned 0 (0x0) execution time : 0.004 s" و
"Press ENTER to continue."
اصلینده بونلار پروقرامین بوراخیشدیغی دئییل‌لر و بونلاری ساده‌جه کامپایلر، بیر تعداد فایدالی ایطیلاعات تکین یازیر.
آیری پروقراملاما دیل‌لر تکین، C دیلی‌نین ده نئچه بخش‌لری وار: