بیر دوٚزن ساده‌جه نئچه ساییدا موشابه موتغیرلردن جورلنیب‌دیر و ائله موتغیرلر تکین ده تانیتیلیر، آنجاق قاباغیندا کروشه وار و کروشه‌نین آراسی، عونصورلارین ساییسین گؤستریر.
آشاغیداکی اینتیجر و صحیح دوٚزنین ۱۵ ساییدا عونصور واری‌دیر.
int deliveries[15];
آشاغیداکی اینتیجر دوٚزن ده ۳ ساییدا عونصوردان تشکیل اولاراق، عونصورلاری آکولاد آراسیندا تعیین اولوبدور.
int totals[] = { 5, 13, 6 };
آخیر عونصوردان سونرا دا کاما (ویرگول) یوخدور، آنجاق کاما یازیلسا، کامپایلر بیر زادین اونوتولماسینی دوشونه‌جک. آکولاد باغلاناندان سونرا دا سمی-کلون یازمالیسینیز. دوٚزنده‌کی عونصورلارین هامیسی، موتغیر ساییلیرلار و کروشه ایچینده‌کی صحیح عدد ایله ده دوٚزن اوچون عونصورین شوماره‌سینی تعیین ائده بیلرسینیز. آشاغیداکی دستورالعمل، totals آدلی دوٚزن اوچون n-جی عونصورا ایشاره ائدیر و printf فانکشنی ایله اونو چاپ ائدیر:
printf("%d\n",totals[n]);
دوٚزنین عونصورلاری موتغیر تکین داورانیرلار و اونلار اوچون ده میقدار ایختیصاص وئرمک اولار.
آشاغیداکی دستورالعمل بو موضوع اوچون یازیلیب‌دیر و totals دوٚزنی اوچون n-جی عونصورونا 14 میقداری ایختیصاص وئریر.
totals[n] = 14;
دوٚزنین اوزونلوغونو تعیین ائدن‌دن سونرا، بیر داها اونو چوخالدیب یوخسا آزالدا بیلمه‌سینیز.
بو محدودیتی سیندیرماق اوچون بیر نئچه پوٚف‌لر اولسا دا، ایندی‌لیک دوٚزنین اوزونلوغونو دگیشیلمز نظرده آلین.
و بونو دا اونوتمایین: دوٚزن اوچون عونصورلارین شوماره‌سی، صیفر'دن باشلاییر، بیردن یوخ. بو چوخ اؤنملی‌دیر و بو مسئله‌یی اونوتامامالیسینیز.
آشاغیداکی کودا باخین:
#include <stdio.h>
#define MEALS 3
int main()
{
int calories[MEALS];
int x,total;
total = 0;
puts("Calorie Counter");
for(x=0;x<MEALS;x++)
{
printf("Calories at meal %d: ",x+1);
scanf("%d",&calories[x]);
total = total + calories[x];
}
printf("You had a total of %d calories.\n",total);
return(0);
}
۲-جی سطرده ثابیت بیر میقدار تعیین اولوبدور و میقداری دا 3 توتولوب‌دور.
۵-جی سطرده calories آدلی صحیح بیر دوٚزن تعریف اولوبدور و ثابیت میقدار ایله اوزونلوغو تعیین اولوبدور.
سونرا بیلدیگینیز تکین حلقه تشکیل اولاراق، بیر-بیر دوٚزنین عونصورلاری اوخونوب و حلقه قورتولان‌دان سونرا، قاباقجا حسابلانمیش مجموع‌لاری چاپ اولاجاق.
۱۲-جی سطرده و scanf فانکشنینده‌کی calories[x] عونصور دا مونفرید بیر موتغیر اولدوغونا گؤره، & علامتی عونصوردان قاباق یازیلاجاق. بوراخیش دا آشاغیداکی تکین اولاجاق.
Output Terminal
Calorie Counter
Calories at meal 1: 3
Calories at meal 2: 5
Calories at meal 3: 7
You had a total of 15 calories.
Process returned 0 (0x0) execution time : 10.142 s
Press ENTER to continue.
۷-جی سطرده total موتغیری اوچون اولیه میقدار وئریلیب‌دیر و بو ایش لازیم‌دیر، یوخسا موتغیر اوچون توتولان میقدار، سهو و یانلیش ایطیلاعات ایله دولو اولا بیلر.
C پروقراملاما دیلینده موتغیرلر اوچون بیر میقدار ایختیصاص وئریلمه‌سه، اولیه میقدار توتمازلار.
۷-جی سطری ایکی ایسلش ایله کامنته چئویریب و یئنیدن پروقرامی کامپایل و ایجرا ائدین.
بو نتیجه ایسه قالیب شانسا، اولیه میقدار بللی اولماسا، صیفر ده اولا بیلر، ۱۰۰۰ ده اولا بیلر.
یاخشی، قاباقجا دئدیگیمیز تکین، C پروقراملاما دیلینده، ایسترینگ بیر نوع دوٚزن حساب اولور و نورمال اولاراق، اونلارین میقداری ایکی دوبل-کوت آراسیندا تعیین اولور.
آشاغیداکی کودا باخین:
#include <stdio.h>
int main()
{
char text[] = "I am a string!";
puts(text);
return(0);
}
۴-جو سطرده یئیین انتیساب ایله، کاراکترسل text دوٚزنین (ماتریس) میقداری "I am a string!" جومله‌سی ایله بیر توتولور. البته دوبل-کوت علامت‌لری ایسترینگ‌دن ساییلمایاجاقلار.
Output Terminal
I am a string!
Process returned 0 (0x0) execution time : 0.003 s
Press ENTER to continue.
آشاغیداکی پروقرامین، اوٚستده‌کی پروقرام تکین بوراخیشی اولاجاق، آنجاق دوٚزن اوچون تعریف یازماسی فرق ائدیر:
#include <stdio.h>
int main()
{
char text[] = {
'I', ' ', 'a', 'm', ' ', 'a', ' ',
's', 't', 'r', 'i', 'n', 'g', '!', '\0'
};
puts(text);
return(0);
}
text[] بیر کاراکترسل دوٚزن اولدوغونا گؤره، عونصورلاری دوبل-کوت یوخ، بلکه تک-کوت ایله تعیین اولورلار.
آنجاق بیر نوکته‌یی بیر داها وورغولایاق: ایسترینگ اوچون سوْن کاراکتر، Null کاراکتری‌دیر و بونا گؤره ده سون کاراکتر اوچون \0 قاچیش کاراکتری‌سین ایستیفاده ائتمیشیک و دوبل-کوت ایله ایسترینگ تعریف اولارکن بو قاچیش کاراکتری لازیم اولمور.
داها دوغروسو دوبل-کوت ایله ایسترینگین تعریفی، اتوماتیک بو بوش کاراکتره شامیل‌دیر.
#include <stdio.h>
int main()
{
char hello[] = "salam, arxadash!\n";
int n;
n = 0;
while(hello[n] != '\0')
{
putchar(hello[n]);
n++;
}
return(0);
}
پروقرام چالیشان‌دا، بیر حلقه یارادیب و ایسترینگین کاراکترلری‌نی، بیر-بیر اوخویوب و بوش کاراکتر \0 ایله موساوی اولماسالار، چاپ ائدیر و بوش کاراکتر ده ایسترینگ اوچون سون کاراکتر اولدوغونا گؤره، ایسترینگ اوچون چاپ عملیاتین هاراجان ادامه تاپماسی تعیین اولوبدور.
آرتیق ۶-جی سطرده گئنه ده n اوچون اولیه میقدار ایختیصاص وئریلیب‌دیر.
Output Terminal
salam, arxadash!
Process returned 0 (0x0) execution time : 0.008 s
Press ENTER to continue.
بوندان اؤتور اوٚستده‌کی پروقرامی، آشاغیداکی تکین یازماق اولار:
#include <stdio.h>
int main()
{
char hello[] = "salam, arxadash!\n";
int n;
n = 0;
while(hello[n])
{
putchar(hello[n]);
n++;
}
return(0);
}
گؤردوگونوز تکین، ۷-جی سطرده‌کی شرطین یازماسینی دگیشه‌رک، پروقرامین بوراخیشی دگیشمه‌ییب.
Output Terminal
salam, arxadash!
Process returned 0 (0x0) execution time : 0.007 s
Press ENTER to continue.
گؤردویونوز تکین ایسترینگ یوخسا باشقا بیر دوٚزن، ساده‌جه موشابه عونصورلاردان تشکیل اولور. آنجاق همیشه ده بو عونصورلار تک-بوعدلو دگیل‌لر و بیر سطرده اولمورلار.
بعضی واقتلار، شبکه تکین دوٚزنلر ایله چالیشمالیسینیز و بئله بیر شراییطده، نئچه-بوعدلو دوٚزنلر (ماتریس) دونیاسی‌نا گئچیرسینیز.
بو فصلین گلنکی بؤلومونده ائله بو موضوع اوچون صؤحبت ائده‌جه‌ییک، یعنی نئچه-بوعدلو دوٚزنلر.