ایشاره‌چی‌نین ایکیلیک طبیعتی

بیر ایشاره‌چی، اولدوز اوپراتور ایله تعریف اولسا دا، همیشه بو گؤرونتو ایله ده ایستیفاده اولونمور.

ایشاره‌چی‌نین اولدوزو اولماسا، حافیظه‌ده‌کی موقعیت اوچون ایشاره ائدیر، آنجاق اولدوز ایله یازیلارکن، اولدوغو موقعیت اوچون ایختیصاص وئریلن میقداری آچیقلاییر.

ایشی ده عموما دولاشیق گؤسترن ائله بودور. بونو اونوتماسانیز، مسئله‌یی قاریشدیرماسینیز.

ایشاره‌چی‌نین دئدیگیمیز ایکیلیک طبیعتی ده ائله بودور. بو دا سون‌سوزا قدر گیج ائدیجی اولا بیلر.

نیسه، قاباقجا تانیدیغینیز کاراکترین ده بوجور ماهیتی اولاراق، بعضا سیزی کاراکتر و اینتیجر آراسیندا شاشقین بوراخا بیلر.

آشاغیداکی پروقرامدا قاباقکیلار تکین اولاراق، babak موتغیری اوچون ده اولیه میقدار وئریلیب‌دیر.

#include <stdio.h>
int main()
{
int babak;
int *b;
babak = 987;
b = &babak;
printf("The address of \"babak\" is %p\n",&babak);
printf("The contents of \"babak\" are %d\n",babak);
printf("The address of \"babak\" is %p\n",b);
printf("The contents of \"babak\" are %d\n",*b);
return(0);
}

بوراخیش دا بونا اوخشار اولاجاق:

Output Terminal
The address of "babak" is 0x7ffcd7e88b6c
The contents of "babak" are 987
The address of "babak" is 0x7ffcd7e88b6c
The contents of "babak" are 987

Process returned 0 (0x0)   execution time : 0.005 s
Press ENTER to continue.

چوخ آیدین‌دیر و قیسا توضیح‌لره کفایت ائده‌جه‌ییک.

۸-جی سطرده، ‎%p یئر ساخلاییجی‌سی یازیلیب و ‎&babak ایله، babak اوچون آدرس چاپ اولاجاق.

۹-جو سطرده، ‎%d یئر ساخلاییجی‌سی یازیلیب و ‎babak ایله، babak اوچون میقدار چاپ اولاجاق.

۱۰-جو سطرده، ‎%p یئر ساخلاییجی‌سی یازیلیب و ‎b ایله، b اوچون آدرس چاپ اولاجاق.

۱۱-جی سطرده، ‎%d یئر ساخلاییجی‌سی یازیلیب و ‎*b ایله، b اوچون میقدار چاپ اولاجاق.