"Code::Blocks"ین چالیشماسی
Codeblocks چالیشان‌دان سونرا، اصلی صفحه‌سی گؤرونه‌جک.
بونا workspace دئییرلر. بیز ده ورک-اسپیس یا workspace دئیه‌جه‌ییک، یعنی ایش فضاسی.
سوْل ألده مدیریت پانلی وار و اورتادا ایسه متن دوٚزلتمک اوچون اصلی محیط.
آشاغیدا پیام‌لار و اوُیاریلار اوچون اختصاص وئریلمیش یئر گؤرونور.
ایندی ایسه تنظیمات:
CodeBlocks پروگرامیندا، اوٚستده‌کی منودان setting سئچَنگی (گزینه) سئچین و Editor بؤلومونده سوْل ألده general settings بؤلومونده‌کی show line numbers سئچَنگین فعال و چک اوْلموش حالت‌ده اولماسیندان مطمئن اولون.
فونت اوچون، choose دوگمه‌یی وورون و ایسته‌دیگینیز فونتو سئچین. آنجاق monospace ده یاخشی فونت ساییلیر. دوم دوز monospace آدی ایله بیر فونتو تاپماساز دا، mono کلمه‌سی ایله بیرلیکده بیر نئچه فونت‌لاری تاپا بیله‌جکسیز. بونلار ائله monospace فونتی تکین یازیرلار و ائله ده فرق‌لری یوخدور. مثلا ubuntu mono و DejaVu Sans mono تکین فونت‌لار.
معمول اولاراق، اونوتولان ایش، اویغون ترمینالی سئچمکدیر.
کوْدلاری کامپایل ائتمک اوچون اویغون ترمینالی تعیین ائتمک لازم‌دیر. البته بعضی اوقات اؤنجه‌دن سئچیلمیش ترمینال، اصلا سیزین سیستم‌ده تاپیلمیر.
مثلا بیز xubuntu (ubuntu + xfce) لینوکس ایشلتدیگیمیزه گؤره، settings و سونرا environment قسمتینده ترمینال اوچون، xfce-terminal -T $TITLE -x سئچمیشیک. بو تنظیماتی تاپماساز، ایسته‌دیگینیز تکین ده اویغون تنظیماتی یازا بیلرسیز.
آنجاق اونوتمایین، لینوکس یئکه و بالا حرف‌لری آیری حساب ائدیر و terminal یئرینه TERMINAL یازماق اولماز. ویندوز اوچون ایسه cmd وار و چوخ دا اویغون‌دور.
عموما پروگرام دوزلتمک ایشی، سورس کُد یازماق و کامپایل و سونرا اونو لینک ائتمکدن عبارت اولور و بونلارین دوزگون چالیشماسی اوچون ده نئچه ساییدا دستورالعمل وار.
ایلک یول تنظیماتی یئرینه چاتدیراندان سونرا، بوْش بیر پروژه یارادین و اجرا اولماسینی دا تست ائدین و سینایین.
بو یول ایله ایشلرین دوزگون اولوب یوخسا اولماماسیندان اطمینان تاپا بیلرسیز.
لینوکس و مک سیستم‌لری اوچون اجرا اولا بیلن فایل‌لارین .sh سون-أکلری اولور و ویندوز اوچون ده .exe سون-أکی وار.
کامپایل و لینک اولماغین نهایی و سوْن نتیجه‌سی، پروژه‌نین bin دایرکتوری‌سینده ذخیره اولور.
اونون آلتینداکی دایرکتوری‌ده، debug اوچون کامپایلین نتیجه‌سی debug دایرکتوری‌ده و release اوچون کامپایلین نتیجه‌سی ده release دایرکتوری‌ده اولور.
داها آیدین باشا دوشمگینیزه گؤره بوش بیر پروژه دوزلدین.
CodeBlocks بیر نوع پروژه-محور IDE'دیر. مثلاً C اوچون، console programs/applications یایغین پروژه تانینیر.
اصلی ورک-اسپیس‌دن یا دا فایل منوسوندان، create new project سئچین.
سونرا concole applications و سونرا Next و …
ایندی C دیلی سئچین، بو دا چوخ آیدین و بللی‌دیر. بیز C دیلینه گؤره صحبت ائدیریک.
سونرا پروژه‌نین آدی و ذخیره اولمالی یئرین آدرسینی سئچین و اولماسا دا یارادین.
و آخر ایش ده، finish دوگمه‌یی وورماقدیر.
سوْل ألده مدیریت پانلینده، main.c سئچیب و آچماق ایله، سورس کد محیطینه گیره بیلرسیز.
بونا اوخشار بیر متنی گؤرمه‌لیسیز:
#include <stdio.h>
#include <stdlib.h>
int main ()
{
printf ("Hello world!\n");
return 0;
}بوراداکی یازیلارین نه اولدوقلارینی سونرایا بوراخیریق و ساده‌جه تست ائدیریک.
اوستده بونلاری تاپا بیلرسیز. ساری آیکون build اوچون ایشله‌نیر. آچیق یاشیل مثلث آیکون ایسه اجرا و run اوچون. سونراکی build + run اوچون و آچیق گؤی رفرش علامتی اولان آیکون ایسه rebuild اوچون.
اوستونده ضرب علامتی اولان قرمز مربع آیکون ایسه، کامپایل عملیاتینی سؤندوٚرمک و کسمک اوچون ایشله‌نیر.
ایندی build+run ائدین و نتیجه‌یه باخین.
بوٚتون ایشلری دوٚز گئتمیش اولساز، پروگرام اجرا اولاجاق و بوراخیش صفحه‌ده بئله گؤرونه بیلر:
Output Terminal
Hello world!
Process returned 0 (0x0) execution time : 0.004 s
Press ENTER to continue. بوتون بونلاری، اصلی منودان دا ائده بیلرسیز.
دقت ائله‌سز، اوٚستده file , build , … منولاری گؤره بیلرسیز.
نیسه، اجرا ائدین ...
ENTER دوگمه‌یی وورساز ترمینال‌دان چیخاجاقسیز و یئنی‌دن متن دوٚزلتمک محیطینه قاییداجاقسیز.