متن دوزلتمک، کامپایل، لینک و ایجرا ائتمک اوچون نئچه آراج (tool) و آچارلارین توپلانمیشی IDE یا Integrated Development Environment (بیرلشمیش توسعه موحیطی) تانینیر. دیباگ ائتمک، کامپلکس پروقراملاما و گرافیک‌سل تکین اسباب‌لاری دا بونا آرتیرماق اولار.
بونلارین هامیسی‌نین آلتیندا، موتواضیع کامندلاین کامپایلر و باغلاشدیریچی (Linker) یئر آلیب.
ایشلر ائله قاباقکیلار تکیندیر. متن یازماق، کامپایل، لینک و ایجرا. ساده‌جه گؤرونتو دگیشیلیبدیر.
یاخشیسی دا بودور کی بوٚتون لازیم اولانلاری اینترنت‌دن پول‌سوز آلا بیلرسینیز. آنجاق هانکی آراج و وسیله‌یی نئجه دوٚز سئچیب، دوٚزگون نصب ائدیب و قوْشماغینیز دا بیراز پیس اولا بیلر.
بوتون لازیم اولانلاری بورادا شرح وئردیگیمیزه گؤره، بو کیتاب‌دا دئییلن صؤحبت‌لر چتین اولمویاجاقلار.
نئجه دوٚز IDE پروقرامی سئچمک، هانکی کامپایلری قوْشماق و نئجه بوتون زادلاری قوشوب و تنظیم ائتمگی کامل باشا دوشه‌جکسینیز.
اینترنت‌دن چوخلو IDE پروقرام‌لاری تاپا بیلرسینیز، مثلا مایکروسافت اوچون Visual Studio و أپل شیرکتی اوچون ده Xcode وار و لینوکس اوچون ده چوخ یونگول و ساده Geany وار.
بئله آراجلاری ایشلتمک ده یاخشیدیر، اؤزللیکله اونلار ایله راحات اولسانیز. آنجاق بو کیتاب‌دا Code::Blocks ایله قاباغا گئدیب و اونونلا چالیشماغی شرح وئره‌جه‌ییک.
CodeBlocks اوچون یاخشی نوکته بودور کی اونو نصب ائدن‌دن سونرا، فیلان و بهمان آرتیرمالاری آختاریب و نصب ائتمگینیزه احتیاج قالمیر. ساده‌جه اونو نصب و تنظیم ائدیرسینیز و تامام.
دئدیگیمیز آراجی، گلنکی باغلانتی و لینک‌دن ألده ائده بیلرسینیز: www.codeblocks.org
سئودیگینیز اینترنت-مورورچوسو (مرورگر ، web-browser) ایله بو آدرسه گئدین و سیستمینیز اوچون اویغون اولانی ائندیرین (دانلود).
Download یازیلان لینکه قوشولسانیز، موختلیف نوع دانلودلاری گؤره‌جکسینیز.
معمول حالت‌ده، microsoft windows, Mac OSX و Linux اوچون لینک‌لری گؤره‌جکسینیز.
صفحه‌ده Download the binary release لینکین اوسوتونده کلیک ائدیب و سونرا سیزه اویغون اولان پکئیجی سئچه بیلرسینیز.
ویندوز اوچون codeblocks-20.03mingw-setup.exe لینکی و لینوکس اوچون ده codeblocks_20.03_amd64_stable.tar.xz سئچه بیلرسینیز.
لینوکس اوچون، package manager تکین پکئیج نصب ائدن وسیله‌لردن ده ایستیفاده ائده بیلرسینیز و حتی ترمینال‌دان دا بونو نصب ائده بیلرسینیز.
یعنی مثلا ترمینال‌دا آشاغیداکی دستور ایله سیستمینیز اوچون اویغون نوسخه‌یی نصب ائده بیلرسینیز:
sudo apt-get install codeblocks
بیز codeblocks-contrib و hunspell پلاگینی ده نصب ائتمیشیک.
البته مثلا اوبونتو لینوکس اوچون tar.xz سوْن-أکی ایله اولان باینری‌لرین ایچینده، .deb فایل‌لاری وار و بوتون لازیم اولانلار بیر یئرده یئرلشیبلر.
بیر نوکته وار، ساده‌جه لینوکس‌دا سیزه g++ دا لازیم اولاجاق. بونا گؤره ده اونون سیستم‌ده اولماسینی کونترول ائدین:
g++ --version
g++ تاپیلماسا، اوندا package manager یوخسا terminal ایله اونو نصب ائدین. Ubuntu و Debian اوچون قاباقداکی دستورو ترمینال‌دان ایجرا ائده بیلرسینیز:
sudo apt-get install g++
ویندوز دا چوخ راحات‌دیر، ساده‌جه دانلود اولموش فایلی ایجرا ائدین و تامام.
یالنیز اونوتمایین، ائندیریلمیش فایل‌دا، MinGW اولماسا، اوندا کامپایلر و باغلاشدیریچی آراجلاری آیری یئردن آدرس وئرمه‌لی اولاجاقسینیز.
آنجاق ایشی ده دولاشدیرماق لازیم دئییل، ساده‌جه codeblocks-20.03mingw-setup.exe فایلی ایستیفاده ائدین و تامام.
لازیم اولان نوکته‌لری گله‌جکده آچیقلاییب و توضیح وئره‌جه‌ییک.
Code::Blocks ایله راحات اولماسانیز، Geany پروقرامی دا ایشلده بیلرسینیز. بونا گؤره گله‌جکده بیر قیسا آرتیرما بؤلومونده بیراز آچیقلاما یئرلشدیره‌جه‌ییک.