باشدان دیبه هامیسی دوٚزگون، قالب توتموش و اویغون شکل‌ده یازیلان و پروگراملاما دیله شامل اولان آچیق و آیدین متن، سورس کد تانینیر. C دیلینده‌کی فایل‌لار c. سون-أکی (extension) ایله ذخیره اولورلار. بو کُدلاری، هدف و آبجکت کدا تبدیل ائدن واسطه ایسه کامپایلر تانینیر.
اصلینده کامپایلرین گؤردویو ایش، پروگراملاما دیلینده‌کی یازیلان متنی دونانیما (hardware) باشا سالماق اوچون، ماشین دیلینه چئویرمک‌دیر.
ماشین دیلی راحاتجا باشا دوشونولمز، لاپ بئله آز-چوخ باشا دوٚشونولسه ده، دیرک (موستقیم) ماشین دیلی ایله سافتوار اوٚرتمک (تولید ائتمک)، دوشوندویونوزدن قات قات قات قات قات چتین‌دیر. بونا گؤره ده اینسان و ماشین آراسیندا کامپایلر تکین بیر آراج و واسیطه اولمالی‌دیر.
بو کامپایلری بیر موترجیم تکین ده نظرده توتا بیلرسینیز.
سورس کود یارادماق اوچون، متن دوٚزلدن (text editor) لازیم اولاجاق. دوغروسو هر بیر متن دوزلدن ایله بو سورس کودو یازماق اولار، آنجاق بیر نئچه متن دوٚزلدن‌لرین رنگلی کوْد، سطر ساییسی و سینتاکس گؤسترمک تکین آیری ایشه یارایان اؤزللیکلری ده وار.
سورس کود سونرا آبجکت کودا تبدیل اولور و قاباقجا دانیشدیغیمیز کامپایلر، بو ایشی گؤرور.
C دیلی‌نین مرسوم کامپایلری‌نین آدی دا CC'دیر، یعنی C Compiler و دئدیگیمیز تکین، سورس کودو اوخویوب و اونو آبجکت کودا چئویریر.
آبجکت کود فایلی دا o. سوْن-أکی و سورس کودا موشابه آد ایله ذخیره اولونور.
یعنی بئله:
(filename_01.c >> compiler >> filename_01.o)
سونراکی ایش، باغلاشدیرماق یا لینک ائتمک‌دیر (linking). عموما مودرن کامپایلرلرده، کامپایل و لینک ایشی‌نین بیر باشا گؤرولمه‌سی اوچون، بو لینک ائتمک مرحله‌سینه ایشاره اولونمور، آنجاق دوغرودان دا آیری بیر ایش‌دیر.
ایجرا اولا بیلن پروقرامی یارادماق اوچون، آبجکت کودو Linker (باغلاشدیرماق و لینک ایشینی گؤرن پروقرام) آلیٚر و C دیلی‌نین کیتابلیقلاری (libraries) ایله بیرلشدیریر.
C دیلی‌نین بو کیتابلیقلاری ایش آتلاری تکین اولاراق، پروقراملاما اوچون روتین‌لر و فانکشن‌لره شامیل اولان تجهیزات ساییلیرلار.
بوٚتون ایشلر یاخشی قاباغا گئتسه، نهایی نتیجه و سونوج، پروقرام فایلی اولاجاقدیر.
سونرا سیز پروقرام فایلی ایجرا ائدیب و ایسته‌دیگینیز ایشین نئجه گؤرولمه‌سینی ده سیناییٚب و ایمتیحان دا ائده بیلرسینیز.
آنجاق اولماسا دا، بوتون ایشلری یئنیدن گئدیب گؤره بیلرسینیز. کوْدو دوٚزلیش ائدیب، کامپایل و لینک ائدیب و نتیجه‌یه یئنیدن باخا بیلرسینیز.
بوتون بو ایشلرین هامیسی یعنی ائدیت، کامپایل و باغلاشدیرماق (لینک ائتمک)، کامندپرامپت و ترمینال‌دا ائدیلیر و پروقرامچیلار، ترمینال و کامندپرامپتی یئیین اولدوغونا گؤره چوخ ایشله‌دیرلر.
آنجاق داها یایغین و معمول یوْل، IDE ایشلتمکدیر (Integrated Development Environment) یعنی بیرلشمیش گلیشیم (توسعه) موحیطی.
البته بیر تعداد پروقرامچیلارین IDE پروقراملاری اوچون باخیشلاری چوخ دا یاخشی دئییل. اصلینده IDE ایله تنبل اؤیرندیگینیزی دوشونورلر.
اونلار بئله دوشونورلر کی پروقراملاما گئدیشی، پروقرامچی‌نین بئیین و ذهنیسینده آیدینجا شکیل توتمالیدیر و IDE پروقراملار بو باجاریغا صاحیب اولماغا مانیع اولورلار.