عموما قاباقکی آچارلاری آچیقلادیغیمیز تکین، اوخوماق اوچون r آچاری ایشلنیر و fgets() فانکشن ایله ده فایل‌دان ایسترینگ اوخوماق اولور. اصلینده fgets() فانکشنین آیری باجاریق‌لاری دا وار، آنجاق بورادا یالنیز فایل عملیات‌لاری اوچون صؤحبت ائده‌جه‌ییک.
fgets() فانکشن ایله تانیش اولماق اوچون، آشاغیداکی اؤرنگه باخین:
#include <stdio.h>
int main()
{
char file_content[100];
FILE *fp;
fp = fopen("new file.txt", "r");
fgets(file_content, 100, fp);
printf("%s", file_content);
fclose(fp);
return 0;
}
۴-جو سطرده، 100 کاراکتر اوزونلوغوندا بیر دوزن (ماتریس، آرایه) تعریف ائدیلیب‌دیر.
سونرا ۶-جی سطرده فایلین آدرسی fp ایشاره‌چیسینه ایختیصاص وئریلیب‌دیر و نهایت‌ده ایسه، fgets فانکشنی ایله دوزنین کاراکترلری، ایشاره‌چی‌یه باخاراق تعیین اولونوب‌دور و سونرا دا ۸-جی سطرده ایسترینگ چاپ اولونوب‌دور.
اونوتماسانیز دا قاباقجا 59-جی صفحه‌ده fgets ایله تانیش اولموشدوق.
fgets() فانکشنین شماتیک گؤرونتوسو بئله‌دیر:
fgets( pointer to string array , integer number , FILE pointer stream )
ایلک آرقومان‌دا استرینگ اوچون بیر دوزن یازیلیر، سونرا نئچه کاراکترین ماکزیمم اوخونماق ساییسی و نهایت‌ده ده فایل ایشاره‌چیسی.
اؤنملی نوکته‌لر ده وار. fgets فانکشنی یالنیز بیر سطرین سونونا قدر اوخویار، یعنی \n قاچیش کاراکتردن سونرا داها اوخوماز. بونا گؤره ده بوتون فایلی اوخوماق اوچون، حلقه تشکیل اولمالی‌دیر و بیر بیر سطرلری اوخوماق اوچون چالیشماق لازیم‌دیر.
البته بو خاصیت بیر محدودیت ساییلمیر، تام ترسینه چوخ دا ایش وئریشلی بیر اؤزللیک ساییلیر.
بوندان سونرا، بو فانکشن ده بوش (void) بیر فانکشن دئییل و میقدار دا قایتارا بیلیر.
فایلی اوخوسا، فانکشنین قایتاردیغی میقدار، اوخودوغو ایسترینگ اولاجاق آنجاق فایلین سونونا چاتیب و EOF (بو کاراکتر، فایلین سونون آچیقلاییر و End Of File جومله‌نین موخففی‌دیر) کاراکترله اوزلشسه، NULL ('\0') میقداری قایتاراجاق.
آشاغیداکی اؤرنک‌ده بونو داها آرتیقدان آچیقلایاجاییق:
#include <stdio.h>
#include <string.h>
int main()
{
FILE *fp;
fp = fopen("new file.txt", "r");
char line_read[256]="",file_content[256]="";
while (fgets(line_read,256,fp) != NULL)
{
strcat(file_content,line_read);
}
printf("%s\n", file_content);
fclose(fp);
return 0;
}
بوتون ایشلر قاباقکی تکین‌دیر. آنجاق ۷-جی سطرده ایکی کاراکترسل دوزن تعریف اولونوب‌دور.
یعنی line_read و file_content دوزنلری.
سونرا فایلین قورتولماسینی تشخیص وئرمک اوچون، ۸-جی سطرده بیر حلقه تشکیل اولونوب‌دور.
ایندی fgets(line_read,256,fp) سطری اوخویاجاق و میقداری نول ( NULL , '\0' ) اولانا قدر داوام ائده‌جک.
۱۰-جو سطرده اوخویان سطری ده فایلین موعادیل ایسترینگینه آرتیراجاق.
بئله‌لیک‌له سطر-سطر فایل اوخونوب و file_content دوزنینده ذخیره اولوناجاق.
Output Terminal
1 text has been typed!
Process returned 0 (0x0) execution time : 0.007 s
Press ENTER to continue.