C پروقراملاما دیلینده textfile.txt تکین بیر فایلی، ایسته‌دیگینیز بیر مسیر و آدرس‌ده یارادا بیلرسینیز و قیسا میثال و آچیقلامالار ایله، بونو آیدین باشا دوشه‌جکسینیز.
C پروقراملاما دیلینده، FILE جوره‌سیندن اولان بیر ایشاره‌چی تعریف ائتمک‌له فایل اوچون یارادماق، یازماق و اوخوماق تکین عملیات‌لاری ائده بیلرسینیز.
آشاغیدا filename تکین بیر فایلی fopen فانکشنی ایله اوخوماغا چالیشمیشیق:
FILE *file_pointer;
file_pointer = fopen(filename, mode);
fclose(file_pointer);
اوستده‌کی FILE کلمه‌سی اصلینده بیر نوع دئتا (ایطیلاعات) ساییلیر.
سونرا file_pointer تکین بیر ایشاره‌چی تعریف اولونوب و سونرا ایسه اونون هانکی یئره ایشاره ائتدیگی، fopen فانکشنی ایله تعیین اولونوب‌دور.
اونوتمامیش‌سینیزسا، ایشاره‌چیلر بیر آدرسه ایشاره ائدن واقت، بوش یازیلیرلار و اولدوز علامتی یازیلمیر، بیز ده بیر ایطیلاعات آدرسی اوچون ایشاره ائده‌رک، اولدوز علامتی یازمیریق.
یاخشی، ایندی fopen فانکشنینده‌کی filename بیزیم قصد ائتدیگیمیز فایلین آدی و آدرسی‌دیر و بیر ایسترینگ تکین یازیلاجاق، یعنی دوبل کوت آراسیندا.
مثلاً "new file.txt" تکین.
آنجاق بئله ایسترینگ، یالنیز new file.txt تکین فایلی، پروقرامین چالیشدیغی آدرس‌ده یازاجاق و ایسته‌سک آیری آدرسی تعیین ائدک، اوندا بوتون مسیری فایلین آدی ایله بیرلیکده یازمالی‌ییق.
مثلا بئله یازماق اولار:
fp = fopen("/home/new file.txt" , "w");
سونرا mode تکین آچار وار و بو دا فانکشنین نئجه چالیشماسی اوچون‌دور و ائله بو دا ایسترینگ تکین دوبل-کوت آراسیندا یازیلیر.
آخیر مرحله‌ده ایسه فایلی باغلامالی‌ییق و بونو دا fclose فانکشنی ایله بیتیریریک.
بو دا عادی مسئله‌دیر و بیز ایشیمیزی فایل ایله قورتارینجا، اونو باغلاییریق. بئله‌لیک‌له آیری پروقرام بو فایلی گئنه ایشلده بیلر و حافیظه ده بوشالار.
فایل اوخونا بیلمه‌سه، اوندا fopen() فانکشنی NULL میقداری قایتاراجاق و بونو بیر فایلی اوخوماق اوچون یوْخلاماغا قوللانماق اولار.
#include <stdio.h>
int main()
{
FILE *fp;
fp = fopen("new file.txt", "r");
if (fp == NULL)
{
printf("File not opened!");
}
else
{
printf("File opened!");
fclose(fp);
}
return 0;
}
گؤردوگونوز تکین فایل ایشاره‌چی‌نین میقداری NULL قایتاردیغی واقت، ۸-جی سطر ایجرا اولاجاق و میقداری اولان واقت دا ۱۲-جی سطر چالیشاجاق.
چوخ اؤنملی بیر نوکته وار:
پروقراما باخسانیز، fclose() فانکشنی ۱۳-جو سطرده و else اوچون کروشه‌لرین آراسیندا یازیلیب‌دیر!
سیزجه نییه بئله یازمیشیق و مثلا ۱۵-جی سطردن قاباق و return دستورالعمل‌دن قاباق fclose() فانکشنی یازسایدیق، ایرادی اولاجایدی؟
عیلت آیدین‌دیر. آچیلمایان فایلی باغلاماق اولماز، بونا گؤره ده fclose() فانکشنی، یالنیز فایلی اوخویان قیسمت‌ده یازمالیسینیز. بونا گؤره ده آچیلمایان فایلین باغلانماسینا چالیشسانیز، حتما ایراد گؤره‌جکسینیز.
البته بونو فایل ایشاره‌چینی ایشلنمه‌یه‌رک ده یازماق اولارد، یعنی یالنیز fopen() فانکشنی ایله بو ایشی گؤرمک اولار.