fprintf() فایل عملیاتی اوچون چوخ ایشله‌نن فانکشن‌لردن بیری‌دیر و آدیندان بللی اولان تکین، فایل اوچون ایطیلاعاتی بوراخیر و چوخ مشهور printf() فانکشنه بنزه‌ییر و فورمت تعیین ائده‌رک ایستیرینگی فایل‌دا یازیر.
یاخشی ایندی ایسه قاباقجا یاراتدیغیمیز فایلین ایچینه بیر زادلار یازاجاییق. بو دا fprintf() فانکشنی ایله اولونور. آشاغیداکی میثال‌دا بونو چالیشمیشیق:
#include <stdio.h>
int main()
{
FILE *fp;
fp = fopen("new file.txt", "w");
fprintf(fp, "%d%s", 1, "test text");
fclose(fp);
return 0;
}
۶-جی سطرده‌کی دستور ایله اونجه فایل ایشاره‌چیسی یازیلیر، سونرا فورمت آرقومانی و نهایت‌ده ایسه "test text" تکین بیر ایسترینگ فایلین ایچینه یازیلیر. اما بو هامیسی دئییل!
فایلین ایچینده‌کی بوتون ایطیلاعاتین یئرینه، بیزیم یازدیغیمیز بو متن اوتوراجاق‌دیر.
ایسته‌سک فایل‌داکی ایطیلاعات قالسین و یالنیز بیر زادلار آرتیراق، "a" آچاری ایشلتمه‌لی‌ییک.
سونراکی میثالی ایزله‌یین:
#include <stdio.h>
int main()
{
FILE *fp;
fp = fopen("new file.txt", "a");
fprintf(fp, "%d %s\n", 1, "test text");
fclose(fp);
return 0;
}
۵-جی سطرده a آچاری، ایطیلاعاتی آرتیرماق (append) اوچون دور و ۶-جی سطرده \n قاچیش کاراکتری ایله بیر سطر آرتیراراق، گلنکی سطرده اونجه ۱ تکین بیر اینتیجر عدد و سونرا test text تکین بیر ایسترینگ آرتیرمیشیق.